關係有進步！卓林主動搵吳綺莉傾偈

藝人吳綺莉闊別拍劇7年再拍劇，為Viu TV拍新劇《理想國》拍其中一個單元，她說初接拍時，不太緊張，但覺得角色有點難度，劇中與林祖輝飾演夫婦，兩人育有的一名9歲兒子不幸跳樓身亡，她說：「故事好現實好貼地，我朋友做社工，話上個月就有類似13個個案，佢勸我脾氣好啲，好大驚惕和啟發，故事提醒大人小朋友唔好咁衝動。（劇好負能量擔心影響自己？）我不停洗腦，提大人小朋友唔好做儍事，唔好衝動，拍完去公園曬太陽，生命可貴，珍惜生命，任何事都有解決方法。（受卓林事啟發？）呢兩年係好事，道緊我，朋友都知我性格好急好硬好直，件事令我學習改變，邊方面有問題，要停一停分析再處理，人生如戲。」

問到有否跟卓林聯絡？吳綺莉說：「早排我拍咗個廣告，出咗街，唔知佢喺乜嘢渠道睇到，傳咗message畀我：「You Look Well」，我有覆佢Thanks，係一個進步。」她說卓林快20歲，大家相處要互相尊重，以禮相待：「我同佢係一世最好嘅朋友。」她說沒有去了解卓林在加拿大的生活，沒有特別去看她做的直播。對於卓林做直播收入微，她說：「有睇個標題，但無研究，人係會改變，我唔可以用自己年紀去睇佢，要退到20歲嘅年紀去睇佢，愛係唔講道理，解釋唔到。（學識放手？）大家係最好朋友，互相提點提醒，唔好開口就鬧。（同卓林慶祝下月20歲生日？）睇情況，我都唔興慶祝生日。（飛過去加拿大畀surprise 佢？）唔會，唔搭得飛機，驚surprise到自己，嚇親空姐機師。（卓林改姓Zen？）Zen係禪嘅意思，好小事，我成日畀人話姓賴，有乜都賴人。」