三個女陪慶生！羅樂林70歲大壽喊足三次

藝人羅樂林今日70歲大壽，正日與家人食飯慶祝，而前一晚他獲三個女為他大搞驚喜派對，邀請了近六十人跟他慶生，就連前妻陳寶儀同寶儀家姐陳寶珠都有前來到賀。

羅樂林感動到全晚喊了三次。細女羅苡之表示以往都是一家人食飯慶祝，覺得七十歲是一個值得紀念的日子，故與家姐決定搞搞新意思﹕「已經構思咗半年，正式就籌備咗兩、三個月，又要搵地方、設計場地、邀請卡同餐單。我哋又要聯絡佢嘅舊朋友，因為唔可以畀爸爸知道，所以有啲人係搭上搭先搵到電話，有啲仲專登由內地過嚟出席。（有冇送禮物畀爸爸﹖）冇喇﹗呢個Party已經搞到我哋心力交瘁。（爸爸有咩反應﹖）佢先係呆咗，跟住喊，佢全晚喊咗三次，冇諗過佢咁大反應。今次真係好成功，超額完成，之前一直擔心會穿煲。」

同太太離異冇分居

羅樂林雖早年與太太陳寶儀離異，但關係仍很好，他接受東網訪問時表示：「我都冇諗過搞咁大，只係諗住十個八個親人食餐飯，點知個女搞咁大，都嚇咗我一跳，真係有啲手足無措，喊咗三次！好似蔡少芬，佢當年第一部劇同我拍，佢叫我爹爹，佢都好有心！（同已離婚既寶儀關係仲好好？）我哋冇分開住，都係同一屋詹下，大家相處得好好，有大家空間！人生簡單是福，最緊要大家開心、健康！」