李漫芬大住肚拍台慶劇　連戲西裝扣唔到鈕

藝人李漫芬（Fanny）有份演出即將播出嘅台慶劇《是咁的，法官閣下》，戲中Fanny飾演一名律師，係王君馨好朋友，Fanny表示：「呢套劇我豁出去，監製搵我時話個角色係王君馨死黨，樣子騎呢，我話唔介意，橫掂都係，我做得騎呢啲！好期待套劇出街，好有挑戰性，其實我忙做主持之外，都好鍾意做演員。」

Fanny回想拍攝劇集時，正係佗緊BB五個幾月，劇組上下都對佢好好，Fanny話：「監製搵我，我話大肚喎，會影響角色嗎？佢話唔會，因為律師都可以大肚嘛。劇組好照顧我，未埋位時，就叫我坐低同換平底鞋。」佢仲自爆拍攝時嘅趣事：「有一套西裝要連戲，我第一次拍係扣到鈕，點知補拍時已經扣唔到，要用扣針扣，哈哈。另一次係公司盆菜宴當日要拍攝，我就早啲返去化呢個妝，再去食盆菜，在場啲人唔認得我，呢個造型仲帶畀我好運，我抽中獎，好開心。」