單身過聖誕！蔡思貝張振朗合體過節

正趕拍《機場特警》的蔡思貝及張振朗孖住參加「海洋公園聖誕全城HO Ho Ho揭幕禮」，其中思貝以短裙仔上陣，大騷吸睛長腿！受訪時二人異口同聲話今年冇另一半過佳節，講到思貝日前同誹聞男友余德丞着灰色情侶裝睇騷，她即笑話：「咁啱啫！（開聖誕Party識男仔？）未有Plan，可能要繼續開《機》。」隨時同張振朗過節？他搶話：「益咗你啦！」思貝打趣話可以同最佳拍檔過節都好開心，皆因二人由《踩過界》開始合作，互相見證住大家成長，而張振朗則笑話要介紹兩名姪仔給對方認識。

講到思貝主演的《大帥哥》正在播出，張振朗大爆對方非常緊張：「因為呢套都係大型劇，但聽佢講出街有好多人叫佢沅婉（戲中名字）都好戥佢開心。」思貝指因為至《踩》後都沒有作品出街，故特別緊張、驚大家會失望，幸好劇集出街後都有好回響，令大家再次有追電視睇的情懷：「係Dicky（張衞健）想要嘅嘢，撮合幾代人食完飯一齊睇電視。」

提到頒獎典禮將至，有三個提名的思貝表示最想同余德丞拎「最受歡迎電視拍檔」：「可以同拍檔一齊拎獎係好開心，我哋一齊拍旅遊節目都拍得好好。而女主角同女角色自問就要更加努力，男主角就最想Dicky拎，佢係實至名歸！」至於張振朗就話最想憑節目《美女廚房》拎「最佳節目主持」：「同林盛斌、蕭正楠呢個合作形式係好難得，節目口碑又好、收視又好。」

--------------------

東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/

如仍未更新東網App，請按此連結收睇360影片： https://bit.ly/2QGuPwb