人氣終於贏姜濤！張敬軒：多謝佢Fans敬老

歌手張敬軒出席頒獎禮，講到撼低男團MIRROR成員姜濤奪得「人氣票王」，他表示有跟姜濤say hi：「我見到佢仲緊張，唔想佢挨咁埋，費事見到年齡差距，但覺得佢哋好有禮貌。（你贏咗佢？）險勝啫，或者佢啲fans敬老留手，寒冬將至，為免老人家平安鐘長鳴，所以佢啲fans收手，我其實啲fans都撳到手痛。」他亦謂在他心目中MIRROR是人氣王：「係新嘅氣象，除咗傳統唱片公司同大台外，又有一個途徑畀人夢想成真。」

「打咗強心針」

問到剛才可有贈他們幾句金句？他笑言：「冇呀，我發現我哋用字唔同，好似有代溝，我同佢哋講畀心機，但佢哋好似一臉黑人問號。」他又笑言之前有做facial：「依家成日盡量岳高頭，防地心吸力，所以我有幾個法寶對抗新人，就係防地心吸力岳高頭同早啲瞓。」講到他在頒獎禮奪4獎，他表示：「今日係打咗支強心針，今年都畀自己高分，好多人都問我做咩仲拍咁多搞笑片，其實我覺得無論咩時候都當自己新人咁做，今年出咗兩隻碟，以量取勝，出年我都會做youtuber，定時拍啲娛樂節目。」

「好仰慕軒仔」

而姜濤對於贏不到獎，他不覺唔抵：「冇諗過自己會有第二，都冇留意投票，除咗工作之外都冇留意自己嘅嘢，好開心張敬軒先生會記得我，我好仰慕佢。（軒仔出口術幫自己拉票，你有冇？）我唔記得自己有冇，都冇乜留意佢點講，但好開心前輩會記得我。」

問到之前見過軒仔未？他表示之前離遠在簽唱會見過，並緊張謂：「都有諗陣間會唔會見到佢，同埋講咩好。（你好緊張？）係呀。（如果見到佢會講咩？）你好。（會唔會抄牌？）可以呀？會試吓。」