MIRROR玩暗黑風　姜濤Chok爆眼神交足戲

男團MIRROR成員姜濤成功喺ViuTV選秀節目《全民造星》成功彈出後，廣告浪接浪，早前賣護膚品賺女人錢嘅佢，日前夥拍兩位成員陳卓賢（Ian）和江熚生（Anson Kong）變身韓仔穿上時裝品牌拍廣告硬照。

姜濤再唔使開胸，唔派心心嚟迷惑女士們，而係大玩帥氣谷行chok樣扮男模，姜濤話喺拍攝過程中同工作人員相處得好開心：「因為其中幾個工作人員，原來係我嘅粉絲，所以同佢哋傾偈好開心。」問到拍服裝硬照可有難度？佢就覺得：「同以往影相唔係好同，唔需要太大動作，但要有眼神表現囉，不過我就覺得個妝好勁，幾暗黑。」

Ian拍攝時就鬧出笑話：「因為唔記得咗自己化咗眼妝，唔覺意揩到，搞到一隻眼啲妝花咗囉。」又謂頗喜歡今次嘅造型，皆因平時形象較斯文，但今次則走黑暗路線。至於Anson就話平時只慣擺跳舞甫士，但今次要擺模特兒甫士就有啲唔習慣。