陳柏宇視古天樂為勁敵：現實中係唔同Level

歌手陳柏宇（Jason）孖組合Super Girls成員陳穎欣（Yanny）今日現身北角匯，與新鴻基地產代理租務部總經理鍾秀蓮及海匯酒店總經理高冠恩，分別為商場及海匯酒店、主題「Snoopy Christmas Garden」進行開幕儀式及啟動禮。

投票畀好友周國賢

講到Jason不負眾望成功入圍叱咤樂壇「我最喜愛的男歌手」最後五強，問到可會想「冧莊」奪獎？他謙虛指冇預算自己會否有獎：「如果再攞當然會開心，但唔想以獎項去決定嗰年嘅成績係好與差。（今年古天樂都有份角逐，覺得佢係勁敵？）年年都有勁敵嘅，古天樂都係一個勁敵，但現實生活中佢係唔同Level，佢高好多！」Jason指冇習慣投畀自己，反而會將一票投畀好友周國賢，至於太太就一早Call齊全家為自己拉票，相當Sweet！

囡囡聖誕冇禮物

Jason表示聖誕節撞正開騷，會同Fans一齊度佳節，問到會否準備禮物給囡囡Abigail？他打趣話因為囡囡仲細，未識享受禮物，但就會準備禮物給太太，以慰勞她這段辛苦湊B的日子：「囡囡依家飲奶又飲得辛苦。（佢唔肯飲？）佢係唔鍾意飲奶。（有冇解決方法？）冇㗎！畀佢照飲，堅持多陣佢就會飲。」又透露開完騷就會為囡囡搞百日宴。

唱韓文歌冇下次

問到之前為韓星IU的演唱會擔任嘉賓時大唱韓文歌，聖誕騷會否帶來同樣驚喜？Jason笑住話冇下次：「本身唔識韓文，用咗兩、三個月去背發音，迫自己去挑戰一個覺得完成唔到Task，又難又好玩，都開心知道原來自己仲有能力。（有語言天份？）都有啲嘅，模仿聲音都可以，但理解詞彙就唔係好好。」

----------------------------

東網巨星開咗ig喇，大家快啲follow啦！

https://bit.ly/2JjSVcr