跨界設計珠寶！容祖兒揚言戴住赴阿嬌婚宴

天后容祖兒以珠寶設計師身份出席英皇珠寶全新推出的「英皇珠寶 x 容祖兒Heartbeat心動系列」活動，她以Deep V晚裝配襯自己操刀設計的頸鏈、手鈪、戒指等鑽飾系列，當司儀以珠寶設計師介紹她時，她亦忍不住興奮大笑，又擺出模特兒甫士給大家拍照。祖兒開心表示：「諗都冇諗過設計珠寶，今年有好多新嘗試，開頭答應之後都有啲想縮沙，壓力都大，但人哋畀機會就接受呢個挑戰。」

問是否會戴頸上的鑽石鏈出席阿嬌（鍾欣潼）婚宴？她謂：「係呀！呢個得一條。（送自己系列鑽飾畀阿嬌？）呢啲唔使我，有楊生（老闆楊受成）贊助，酒席都係佢，我同阿Sa（蔡卓妍）就送結婚蛋糕。」

醉後驚爆料

之前祖兒未停過宣傳，幸好這幾天有時間休息，她指會以最佳狀態赴宴，更揚言到時奉陪到底。問會頂酒？她說：「幾杯都ok嘅，阿嬌要我上台講嘢，我都問佢係想我酒前定酒後？（怕醉後失控爆料？）自己嘅會控制得好好，控制人哋嘅秘密就唔知喇！」

讚古天樂係娛圈之光

另外，講到古天樂（古仔）奪叱咤「我最喜愛的男歌手」的呼聲好高，古仔會考慮出席時，祖兒開心表示：「即係去啦！Yeah！我絕對希望見到佢！」古仔又說有和祖兒唱K，若祖兒想聽他唱歌，唱K便可，但祖兒說：「私下唔夠，佢咁靚嘅歌喉，要同大家分享，同埋佢已經成為咗娛樂圈之光！」