回歸拍劇有新鮮感　汪明荃讚張衞健有實力

藝人汪明荃及鄭少秋（秋官）前後腳現身，到演藝學院觀賞粤劇名劇《小周后》，汪明荃表示特意前來捧粵劇名伶陳培甡場：「睇吓精彩演出，順便又學吓嘢！（為西九戲曲中心開鑼做準備？）唔係，出年9月先公演，今個月30號就開幕，咁我係八和會館主席，都要去打點一切。」

講到《萬千星輝頒獎典禮》即將舉行，汪明荃一直睇好黃智雯（Mandy）奪視后，而Mandy更已連中兩元，榮獲兩個視后獎，問汪明荃可會希望Mandy再下一城？她即笑言其他入圍者表現都唔錯：「入得圍都咁好！好似有成二十幾個入圍者，可能攞咗兩個獎（袁偉豪、Mandy）大機會啲，係其他未發力啫！（有心水人選？）冇，個個都咁努力。」

問會否睇好張衞健（Dicky）攞獎？汪明荃就表示未睇過《大帥哥》，但亦認同Dicky有實力，加上回歸TVB拍劇，一定有新鮮感：「有睇佢啲宣傳片，都幾得意。（佢話如果攞咗會再拍！）唔攞都要再拍呀，唔好忘記香港嘅觀眾！（觀眾都期待你拍！）諗吓啦，都要遇啱好劇本同好對手。（如果對手係秋官呢？）唔好問啲假設性嘅問題，你問佢啦！」她續指現時好少劇本適合自己，唔想再做太多重覆的阿媽角色。