有得諗？鄭少秋搵汪明荃拍《大時代》電影版

藝人鄭少秋（秋官）晚上到演藝學院觀賞佛山粤劇團名劇《小周后》演出，講到如果再要汪明荃（Lisa姐）出山拍戲，條件是要有好對手，問到秋官願意再同Lisa姐拍住上？他說：「可以傾吓，其實都係睇劇本。（再做會想飾演咩角色？）都係情侶啦！話晒都談咗情咁多年，經驗豐富㗎啦！」

提起上次《大時代》五蟹世紀重聚話有意開拍其電影版，問到當晚可有再詳細度度？秋官繼續笑話傾緊，當記者提議以此劇同Lisa姐合作，秋官即眉飛色舞大讚好提議，兼秒速度好初步劇本：「帶畀觀眾新鮮感，Lisa姐就做女丁蟹，嚟個男、女丁蟹大鬥法！要問問韋家輝（《大時代》監製）先，劉青雲就係我哋兩個生，咁先估你唔到嘛！（咁女呢？）周慧敏就係Lisa姐帶返嚟，呃我話係我嘅，迫我娶佢！嘩！乜你哋當真㗎？（你連劇本都諗好？）果然係丁蟹上身！」秋官果然創意十足，笑翻全場！