冧Fans要瞓身　周柏豪：我都唔想偶像Hea我

歌手周柏豪舉行新碟《ALL ABOUT LOVE 關於愛》簽唱會，事隔一年後再搞活動號召力驚人，逾千Fans逼爆商場大堂，更延伸至樓上三層，柏豪甫出場即獲Fans尖叫聲歡迎，場面墟冚！於活動期間柏豪除大唱新歌外又同Fans親密玩遊戲，拖手、攬攬、翹手、餵嘢食、合巹交杯、幫Fans搽唇膏等，Fans被電到一暈得陣陣，而冇份參加遊戲的Fans則醋爆尖叫！

每次出歌都攞到No.1

受訪時柏豪開心謂每次出活動都有各地Fans前來支持，由於今年集中火力在巡迴演出上，同Fans見面減少，搞到影響投票：「入唔到圍係有原因，咁當然有失落。（依家拉番票？）趕唔切啦，之前慣性大家都會投票唔擔心，但放少咗時間對人氣有影響，咁呢個都係一個等號，好難兼顧所有市場。」雖然如此，柏豪指繼《男人背後》、《老少平安》都獲四台冠軍：「都有檢視番，少作品但每次出歌都攞到Number 1，所以成績都有喺度，公司都傾緊新一個巡演，尾站都會籌備返嚟香港。」

講到剛才與Fans近距離互動，柏豪笑話都要將心比心：「我係Fans都唔想偶像Hea我，所以都會滿足佢哋！」問明日有信心於頒獎典禮憑《烏托邦》攞「最受歡迎電視歌曲」？他說：「都有信心。（有楊千嬅、朱晨麗、陳煒拍片拉票。）佢哋好好，拍完戲變咗好朋友。」

----------------------------

東網巨星開咗ig喇，大家快啲follow啦！

https://bit.ly/2JjSVcr