性感上陣！梁芷珮處女下海做曹永廉情人

無綫電視節目主持梁芷珮（Christy）拍過唔少旅遊節目，周遊列國嘅佢喺節目中性感上陣，又喺社交網大晒索爆泳照，身材仲Fit到爆，令觀眾兼網民大飽眼福，不過大家唔只喺旅遊節目見到佢添！

近日佢處女下海，踩過界參演無綫新劇《她·她·她的少女時代》，仲做番「老本行」飾演旅遊達人，預告會有性感演出呀，佢話：「今次第一次拍劇，劇入面係做曹永廉嘅情人，同佢有好多對手戲，佢超級好人，好有心機同我對稿同提點！而我為咗套劇，努力練腹肌，因為劇中我嘅衣着都幾貼身，仲有場性感演出，我都好期待，好多謝監製畀機會我。」

此外，Christy有份主持嘅無綫節目《西班牙潮什麼》亦會喺今個月播出，Christy話屆時會坐定定喺屋企睇，支持自己！