阿嬌結婚　謝霆鋒古巨基包喜餅！

仲有四日（20日）就係鍾欣潼（阿嬌）嘅大喜日子，呢幾日佢忙住周圍派餅又派帖！仲記得阿嬌宣布求婚成功之後，英皇老闆楊受成就好豪氣咁話包起阿嬌嘅酒席。

除咗老闆有心，同門師兄謝霆鋒同古巨基都全力支持賀一賀佢。喺阿嬌派嘅喜餅當中，香港嘅親友由基仔嘅品牌贊助，內地嘅親友就係霆鋒嘅品牌包辦。喜餅包裝方面亦特別重新設計，霆鋒品牌「鋒味曲奇」以金色及雙喜為禮盒裝，入面仲印有「無論苦辣與甜酸，讓愛相隨。」好有愛！

而基仔品牌嘅包裝盒就同喜帖一樣，係阿嬌同賴弘國嘅卡通插畫，每塊餅嘅包裝都用上粉紅色，收到都覺得勁sweet。話晒阿嬌喺香港同內地都有唔少親朋好友，總數夾夾埋埋隨時過千，今次霆鋒同基仔咁樣賀阿嬌，認真唔話得。