投票畀「仇人」　邱芷微早有心水女配角…

在劇集《愛·回家之開心速遞》有份演出的藝人邱芷微（Chelffy），在劇中飾演「賈名媛」一角，早前與劇中演「大小姐」林淑敏針鋒相對兼唇槍舌劍的一場戲份，令大家看得拍案叫絕：「嗰場戲係話我要報復佢之前破壞我嘅訂婚party及生日party，結果我同佢慶祝生日時請巫師作法落降頭，令對方只要慶祝生日，身邊朋友們會遭遇不幸，因此令對方冇晒朋友。」她又表示有留意網民在網上的反應，有人更希望看到她與「大小姐」鬧交，令她感到非常搞笑。

Chelffy希望林淑敏能在無綫頒獎禮奪得「最佳女配角」獎，她說：「同佢鬧咗交成年，冇佢做對手戲可能都未必有人識我，佢真係令場戲個氣氛昇溫，所以我都好支持同希望佢能夠順利得奬，一定投佢一票！」