生日都為男友諗　黃奕晨愛爆吳嘉熙

女子組合Super Girls成員吳嘉熙（Cheronna）同男友黃奕晨（Dixon）拍拖以嚟愛得甜蜜，尋日（17號）係Cheronna嘅30歲生日，Dixon喺網上晒出攬住女友合照，仲發長文指女友近日不時同佢講30歲即係變成中女，仲話原本想同佢大肆慶祝登山露營，但Cheronna只係想簡單食飯慶祝：「我明白佢考慮到我既（嘅）諗法，擔心我聽日工作要早起，一個自己生日都會為我諗既（嘅）女仔，你叫我點放手。」

佢仲分享與Cheronna之間嘅點滴，承諾會繼續喺佢身邊陪住同支持佢：「有一日我望住佢訓教（瞓覺），望住佢果（嗰）個擘大左（咗）既（嘅）口，有少少反白既（嘅）眼，好似想流出黎（嚟）既（嘅）口水，真係會忍唔住想錫佢一啖，講一聲我愛你，同三十歲人都仲訓（瞓）到咁，三十對一個女人黎（嚟）講，可能係一個重要既（嘅）關口，雖然我地（哋）男人未必明白了解，不過我好多謝你，將你咁重要既（嘅）時間交比（畀）我，祝你三十歲生日快樂。」