【女同事視角】黃溢濠暖男形象冧死女

近年拍片興玩男友、女友視角，不過新進男演員黃溢濠（濠B）就特別啲，整咗段「女同事視角」短片。條片由女同事同經理人麥曦茵操刀，片中嘅濠B非常照顧身邊嘅女同事，展現出暖男一面。

短片紀錄咗濠B平時工作嘅樣，呈現佢日常生活嘅狀態。片中可見，濠B經常笑容滿面，仲好有禮貌，食飯嗰時亦同同事打成一片，連一碟飯兩份食都唔介意。除此之外，無論上車、入餐廳，佢都實行Lady first原則，認真有風度。當佢見到路邊有車時，仲會即刻伸手保護女同事，Man到爆！不過25歲嘅濠B都有大細路一面，不時喺鏡頭前跳跳紮，佢話：「條片紀錄咗我平時做嘢，雖然片入面我好似個大細路，但現實生活中，工作時我會有好多諗法。」

影片一出就成功俘虜一眾少女芳心，有好多網民留言大讚佢係理想男友，仲話好想做濠B嘅女同事呀！

網民有話兒：

Plxxx Lxx：好man呀濠B！

Saxxx Txx：我都想做佢同事呀哈哈

Lxxx Kwxx：理想對象

Jxxx Lxx：仲請唔請人？我想嚟見工