《生死時速》24年！珊迪娜自爆曾冧暖男奇洛

奧斯卡影后珊迪娜布洛（Sandra Bullock）同型男奇洛李維斯（Keanu Reeves）主演嘅《生死時速》（Speed）相當經典，雖然已經上映24年，不過仍然有好多粉絲記得二人於車上幕幕牙煙場面，女方近日上節目時更爆出人往事，原來佢當年曾經戲假情真，冧過奇洛！

珊迪娜日前上名嘴艾倫迪珍妮絲（Ellen DeGeneres）節目，被對方問起當年與奇洛合作嘅經過，表示對方勁Sweet又好靚仔：「對我嚟講要認真（拍戲）真係好難。」仲話奇洛一望佢，佢就會緊張又尷尬咁笑。珊迪娜又爆出奇洛嘅暖男行為：「我條裙成日都會飛起，所以我就同佢講：『你做咩都好，一定要保住我條裙唔飛起！』之後佢成場動作，全程都盡力保住我條裙…真係好Sweet！」雖然好冧豬，但珊迪娜就自言雙方從未約會，笑言奇洛可能未有過電。