網上開新頻道！林盛斌整蠱仔女打響頭炮

藝人林盛斌（Bob）有三個女一個仔，真係一「身」兒女債，為供書教學，搵錢搵唔停，不過佢係廿四孝老竇，點忙都會抽時間同仔女一齊玩。啱啱宣布喺Youtube開咗新頻道嘅Bob，一「開台」就攞班仔女嚟玩！佢上載一條名為「放心，爸爸會努力搵錢㗎嘞」嘅片，片中佢三位千金一副餓相咁爭食一條魚，仲要係用手食，筷子都唔用，加上短片背景音樂悽慘，畫面加咗啲落葉，營造慘情氣氛，唔少網友睇完都話超搞笑！

另一段片，係Bob叫晒四個仔女排排坐，之後佢倒水落地，反問佢哋：「有咩方法，我唔掂啲水，又可以清理咗啲水？」個個聽完都擰擰頭話唔知，點知佢突然一伸手，將坐喺佢前面嘅大女拉前，大女個pat pat好似吸濕器咁抹乾晒啲水！突然畀老竇整蠱，大女摸住pat pat大笑又大叫，三女仲好笑，開心到喺隔籬打觔斗！大批網民留言話Bob玩嘢，Bob回覆：「佢哋幾開心！」