超有愛！杰倫聖誕晒父子合照　昆凌隔空回應

台灣天王周杰倫（周董）對囡囡「小周周」及囝囝「小小周」錫到燶，而且為咗保護佢哋，周董甚少喺社交網「晒娃」，盡量保持低調。呢日周董就好罕有咁喺社交網晒出同囝囝嘅正面大頭自拍，相中見佢抱住囝囝，雖然就用咗黑超嘅圖案遮住囝囝嘅上半臉，但見佢哋兩個都不期然咁嘴扁扁，真係勁有父子相！至於老婆昆凌雖然未有入鏡一齊合照，但佢就喺自己嘅社交平台上晒出一張自拍獨照，仲同佢哋兩仔爺一樣戴上黑超，嚟個隔空家庭裝，相當溫馨！