Honey Moon歐遊！李麗珊睇靚景睇到麻木晒

啱啱「升呢」做人妻嘅歌手李麗珊（Lisa），婚後去咗一個月Honey Moon。Lisa原本計劃今次去歐洲會停留4個國家，但最終都只係去咗英國、意大利同埋瑞士︰「中間有諗過停法國，但嗰陣時發生示威事件，所以就唔敢去，逗留喺歐洲嘅時間都有成20幾日，啲靚風景都睇到麻木晒，去到意大利又好凍，唔係咁舒服係咁流鼻水，嗰陣真係好掛住媽咪煲嘅靚湯水﹗」

Lisa不忘笑嘲自己雖然鍾意食麵包，但餐餐都麵包、芝士、Pizza、意粉，日日咁食法都悶，所以把心一橫四周圍去搵亞洲菜。講到去瑞士雪山觀光，Lisa笑話因為好驚凍，同老公分別都着咗4條褲保暖、羽絨出面仲要再加雨褸，佢自爆中途驚有高山反應，但好彩最後都冇唔舒服︰「一上到雪山見到啲風景咁壯觀，真係覺得自己好渺小。」

成個度蜜月嘅最後一個星期，Lisa同老公與「四大長老」（雙方父母）一齊去泰國「過冷河」兼調整時差︰「人大咗就梗加珍惜同屋企人相處嘅時光，同父母一齊去旅行都係一種福氣。