楊怡力谷自信胸　郭晉安返去綁老婆喺床

藝人楊怡與郭晉安盛裝出席晚宴活動，阿怡更以低胸上陣力谷自信胸，非常性感！從劇集《再創世紀》後，她就開始休息，暫似無意結束悠長假期。當再被追問生仔大計時，她答：「都係隨緣啦。其實我同老公（羅仲謙）都好似大細路咁，我媽咪負責照顧我哋。（跟媽咪學吓煮餸先？）我媽咪有叫我跟佢去買餸，但佢日日都要最早去買新鮮嘢，我要瞓覺搞唔掂。」

當記者搞笑叫安仔「過兩招」教楊怡生仔，他即謂：「真係緣分嚟，我就諗住開心吓、過二人世界先，點知轉頭就有咗。你話起唔到身？我呢6年只要唔使開工，日日朝早6點起身湊返學，做咗父母自然會咁。（因為綁咗老婆歐倩怡喺床，所以咁易？）哈哈，返去試吓先！」

安仔又表示即將起行返內地拍劇，但過年一定返港一轉，楊怡就說：「我試過喺內地過年，有煙花燒，但冇得同屋企人一齊，寂寞啲囉，你可以試吓喎！」