分完又婚？男友見埋家長　石原聰美等嫁

32歲日本女星石原聰美與尊尼偶像山下智久分手後，去年5月被爆撻着31歲的IT公司社長前田裕二，拍拖到沖繩旅行。不過，去年底有傳兩人各有各忙，男方單拖飛夏威夷為恩人慶生，而石原聰美則留在日本度過，加上有傳她強迫男友加入同一宗教組織，因而令兩人陷入分手危機。

不過，今日出版的雜誌《女性自身》卻爆料兩人不但冇分手，反而關係穩定，有望在今年內拉埋天窗。據知男方自小父母雙亡，與哥哥相依為命多年，一直渴望建立自己幸福家庭，故已視石原為結婚對象。他早前拜會過石原的父母，兩老對未來女婿十分滿意。而本月初，石原父母到東京探女兒，當日一家人都心情好好，看來隨時好消息傳出。