康華Rap入樂壇！陳煒攰爆力撐「情敵」

正趕拍《法證先鋒IV》的藝人陳煒，凌晨收工後抽時間現身好友康華的新歌《拼火花》發布會撐場，她自爆雖然跟康華是「情敵」，但都會落力撐：「係喺劇中同佢係由好朋友變情敵，都同佢合作過好多次，佢都有畀我聽首新歌，係好喜慶又開心，好啱過年去登台，希望佢豬籠入水！」又大讚對方可塑性強，唱歌、跳舞都好「耍家」：「同我本身識嘅佢好唔同，佢國語Rap嗰把聲係唔認得，唱番廣東話就認得。（平時片場有聽佢唱歌？）都有，未埋位佢會練聲。」

問到可會有「開金口」計劃？陳煒自言都好鍾意唱歌，但只限於登台、春茗騷，問到會想先唱劇集主題曲小試牛刀？她笑話：「都希望，係2019年目標之一，可以向康華學習，佢呢首新歌好激勵，鼓勵到女性。」