李若彤古天樂24年後重遇　賀李添勝牛一

講起李若彤，一定會諗起被喻為「最美小龍女」嘅稱號，當年佢仙氣逼人，似十足落入凡間嘅女神一樣，連《95神鵰俠侶》入面隻鵰企佢隔籬都靚埋，加上男神古天樂坐鎮做楊過，金童玉女畫面襯到識發光咁滯！當年全憑監製李添勝能夠慧眼識英雄，「攝合」二人創造經典，估唔到24年後大家可以再合體搞gathering，仲順便賀李添勝牛一添！

李若彤同古天樂呢對神仙組合難得碰頭，「姑姑」李若彤就喺社交網甫出多張合照，當中佢同古天樂兩個人嘅合照仲零舍多，二人又Selfie又搵人揸機，搞到啲網友都話佢哋兩個好似放閃一樣咁Sweet，集體回憶當年佢哋啲喺劇中嘅感情，就算係廿幾年後二人都仲係襯到應呀！

而其他出席嘅同劇演員仲有「李莫愁」雪梨、「黃蓉」魏秋樺、「黃藥師」駱應鈞、「傻姑」陳安瑩、「陸無雙」簡佩筠、「孫婆婆」馮素波，真係熱鬧到呢～