將流感傳畀杜汶澤　田蕊妮預告咀爆曹永廉

藝人田蕊妮日前因流感發燒，昨日「被逼」停工休息，今午復工到旺角繼續為新劇《她。她。她的少女時代》拍攝，劇情是「她到Band房聽見兒時偶像李思捷唱歌，從而鈎起不少難忘回憶」。

受訪期間阿田聲沙沙，似乎病菌未清，不過由於台前幕後計劃農曆年前煞科，她惟有「繼續努力」。談㺫病況時說：「本來醫生叫我休息多一日，依家冇發燒，不過今次病情嚟得好急，前日朝早拍咗場戲，完咗即刻周身唔舒服，從未試過咁，有死嘅感覺。尋日我停咗工返到屋企，除咗食藥就係瞓覺，今朝助手睇mon，話我個樣仲精神過平時！」

問是否已經傳染給老公杜汶澤，阿田搞笑謂：「所有嘢都要預佢嘛，要同佢分享。佢只係初期，冇我咁嚴重，佢一早睇咗醫生。佢負責照顧我，我起初郁都郁唔到，打咗針好啲。（尋晚取消咗同曹永廉場露營？）係呀，今晚再露過。佢去咗雲頂登台幾日，有啲掛住佢添，今晚見到我會擁抱同咀佢，都係嗰句，要同佢分享（病毒）呀，哈哈！」