林泳淘生日孖姊妹着閨蜜裝　鄧以婷讚好攬

無綫小花林泳淘（Wingto）同一班big big channel電競組合Godlike Girls嘅姊妹感情好好，除咗聚埋一齊打機，私底下都經常見面。1月生日嘅Wingto就孖住同樣係1月份壽星女嘅鄧以婷慶生，仲搵埋組合成員李君妍、王卓淇、尹詩沛，以及另外兩位好友吳綺珊及利穎怡齊齊慶祝，場面相當熱鬧！

各人都有喺社交網大晒合照，相中見兩位壽星女又收花又收蛋糕，再加上咁多位靚女一齊戴上畫家帽、「閨蜜裝」上陣，真係隔住個mon都feel到佢哋嗰份濃厚嘅姊妹情！Wingto留言多謝姊妹為佢慶祝，而鄧以婷更笑指：「好開心可以同愛美神一齊慶生，Wingto真係好好攬。」