張家輝撩再鬥戲 劉青雲落閘:夠晒喉

20190125
東網電視
更多新聞短片
兩大影帝張家輝、劉青雲同影后林嘉欣鬥戲!
集合兩大影帝張家輝、劉青雲及影后林嘉欣助陣的英皇電影《廉政風雲 煙幕》,昨日(24日)開始在戲院預售,反應熱烈,氣勢如虹,相信這套賀歲猛片定必在大年初一突圍而出。雖然同期有不少中西猛片,但眾演員遇強愈強,一副冇有怕姿態,更將出發內地不同城市作巡迴宣傳。為配合電影主題,三位主角早前到咖啡店拍攝宣傳片,青雲和嘉欣即席學炮製咖啡,相反身體未能承受咖啡因的家輝,卻安坐梳化扮顧客,非常梳乎!
夫妻嗌交爆陰毒
飾演逃走證人的張家輝,繼5年前電影《掃毒》後再與劉青雲合作,今次卻非上司下屬,而是身份對立,家輝戲份集中於澳洲,演廉署調查主任的青雲則主力在香港拍攝,故二人大多隔空過招,鮮有同場戲份,錯過了影帝互相飆戲場面。問到家輝是否未夠過戲癮?他說:「將來應該有機會再同青雲哥合作。(佢話你做導演唔敢合作喎!)我點會吖!佢肯拍我嘅戲嘅話,佢話點就點啦!(同嘉欣三角關係?)其實同嘉欣冇感情戲,佢係青雲太太,我就暗地想佢夫妻關係改善啫。」
近年主攻拍打戲的他,今次以文戲為主,可謂晒盡影帝演技,家輝笑指雖然比打戲舒服,但面對冗長對白,內裏還不乏法律專業用詞,令他睇到都驚:「要提早背對白,反覆去背,喺澳洲成日做宅男背稿,希望可以流暢啲。」
而青雲對於家輝這位舊拍檔,不諱言與5年前一樣健談兼好動,對於二人似未過足癮,他即搞笑謂:「我就覺得夠喉啦!火花唔一定要成日同一場戲,有張力就得。(咁同嘉欣又點?)一開始講我哋分居階段, 導演要求有一場激烈嗌交戲,但唔係要大聲,而係要講陰毒嘢,平時我個人開朗型,唔係啲咁嘅人嘛!」
被車撞一Take過
至於首度與青雲合作的嘉欣,卻遺憾完得太快,笑指雙方全程以電話溝通,故經常要憑空想像對方樣貌。談到激烈嗌交戲,嘉欣說:「呢樣嘢好易投放,因為夫妻日常都會發生,記得導演當初搵我係想我發揮感情戲,第一日就拍嗌交戲,我同青雲好快搵到默契,好多人話佢唔講嘢,其實都好多嘢講,幾有趣。另方面導演又安排追車戲同畀車撞嘅戲我,仲要一Take過,真係好驚,我呢方面係零技巧。(諗住轉型動作演員?)佢哋話我係新打女,但千祈唔好搞我,我唔得㗎!」
攝影:劉斌、吳文聰
嘉欣化妝:Shuen Kong
髮型:Hin Wan
服裝:IRO by ITHK