上月話冇見過！水原希子斷正為Harry賀生日

英國組合One Direction（1D）前「萬人迷」成員Harry Styles上月中驚傳撻着28歲美韓混血女模水原希子，由歐美轉戰亞洲玩姊弟戀，雖然女方事後火速於Twitter留言否認戀情，更講明二人從未見過，不過二人近日已經結伴於日本與友人出遊，仲被友人於社交網上載同場影片，標籤埋兩人的名字！

話題真人騷《粉雄救兵》（Queer Eye）早前去到日本拍特輯，仲搵埋水原希子上節目，節目中的設計師Bobby Berk近日就於社交網上載與水原及Harry等人於新宿二丁目同志酒吧唱K的影片，似去賀Harry踏入25歲，而他與水原企於對方身邊唱K零尷尬與違和感，玩得好盡興，難怪火速再傳擦出愛火，未知水原今次點解釋？此外，連月於日本玩到盡的Harry亦未忘記粉絲，日前於社交網留言多謝粉絲的生日祝福，但就未有提及日本之旅與回應新緋聞。