入廚遭嫌棄　周奕瑋恨食馬海倫鮑魚

無綫藝人周奕瑋（Jarvis）、Super Girls及馬海倫日前為無綫新春節目錄影。廚技了得的馬海倫親身示範烹調家鄉上海菜，又指點一眾後輩下廚，Jarvis自言獲益良多：「我首次同馬海倫合作，但已經可以拜師學藝嘞，跟佢學煮餸好似同自己媽咪喺廚房一樣，我整啲乜佢都睇唔過眼會出手相助。原來佢近年飲食注重健康，所以整元蹄佢唔會炸，煮上海炸春卷佢亦以蔬菜做餡料居多。見佢輕輕鬆鬆就整咗五、六道菜出嚟，真係好犀利，聽講佢平日都好鍾意煮好嘢請同事食，鮑魚、火雞乜都有，希望下次我有咁嘅口福，可以試到食貴嘢就好嘞。」