去泰國參加馬拉松　陳約臨口罩不離身防霧霾

藝人陳約臨（Kelly）早前到泰國曼谷參加馬拉松十公里賽事，因當地持續出現空氣污染，多處出現嚴重霧霾，令Kelly臨出發前都好擔心：「出發前都知道曼谷空氣污染好嚴重，都令我有啲驚。第一日落機嗰時其實都好啲，因為都係搭車，但一出到去，感覺個喉嚨好唔舒服，好似就嚟想病，一定要戴口罩，當地人都戴成三個口罩，好誇張。」

而比賽前兩、三日Kelly話能見度極低，已盡量減少出外，當到正式比賽當日，Kelly仲要凌晨三點起身：「因為凌晨五點半就要起步，個日成績麻麻，都係一個鐘之內，因為天氣比起香港更熱，跑到對鞋都好似着火咁，要不停用水淋個身。」而佢話最難忘喺香港跑完步大家食香蕉，而泰國人係食donut，終於都明白點解佢哋咁鍾意食甜嘢。比賽過後，Kelly除食盡美食之外，仲瘋狂做Spa同按摩，好好咁獎勵自己！