方健儀為舊同事着想　做運動唔敢Chur到盡

藝人方健儀出席大家樂集團「區區開年飯2019啟動禮暨首場開年飯」活動，她笑言新年期間無為而治：「呢個新年好開心，因為老竇以前未退休，會揀農曆新年放假，跟住就要捱貴機票去旅行，但佢依家已經退咗休，隨時可以出發，咁我哋就留港消費，好唔習慣呀，因為出面冇咩人，又唔塞車，我今日喺馬鞍山過海，都係只需25分鐘，所以過年留港都唔錯。」

方健儀又希望新一年可以活得更健康，她指過往凌晨兩、三點才睡覺，現在就變得自律，寧願早起完成手頭工作，晚上十時前睡覺，早上七、八點起床。她發現作息改變，皮膚和健康都改善了，問到有否跟老公一同做運動？她說：「有時會踩單車，但佢踩100K㗎，由元朗去到九龍，我唔得呀，我驚舊同事要做多單突發嘢，我跑步跑5K，5K對我嚟講已經好OK。（會唔會參加今年嘅馬拉松？）冇呀，朋友話好難抽中，加上要跑至少10K，咁我又唔想舊同事做多單突發啦，慢慢嚟，我個新年目標係希望跑超過5K。」