最緊要靚！胡諾言教林穎彤化妝跑馬拉松

藝人胡諾言（胡仔）與林穎彤（Bella）到維園出席渣打馬拉松活動，胡仔表示之前去了日本旅行，所以在當地要跑步還債，返港後都繼續跑。他亦謂今次是跑全馬：「上年成績係3小時43分鐘，今次希望完成到就得，因為左腳筋腱有啲發炎，驚影響狀態，4個鐘完成到就好，唔好咁大壓力，我當晚完成咗仲要錄《流行經典50年》，所以嗰日係好有意義。」而首次參賽的Bella就謂今次跑10K：「最近都有練跑，都OK，有信心。（你練跑成績係幾多？）1小時15分鐘，唔算好快，都輕鬆。」

問到胡仔到時老婆和仔女可會到場支持？他說：「睇吓佢哋，應該都會嚟打氣，希望畀佢哋感受吓，睇到爸爸努力嘅一面。」問Bella到時邊個會到場支持她？她說：「冇呀，經理人話到時喺終點等我，我都諗緊衝最後100米時使唔使補唇膏。」胡仔教路謂：「要呀，唔打得都要睇得，有燦爛笑容同手勢，唔好係辛苦樣，我哋演員嚟㗎嘛，幾攰都要保持靚樣同姿勢。」Bella即笑言：「我會記低。」