《愛．回家》KC變咬唇小公主鬥靚靚大小姐

靚嘢，真係點睇都咁算眼，就好似迪士尼賣座動畫《魔雪奇緣》（Frozen）咁，紅足6年，大人細路個個爭住扮，就連處境劇《愛．回家之開心速遞》嘅「大小姐」林淑敏、「熊若水」呂慧儀同……「KC」歐瑞偉都要Cosplay Elsa！

大小姐佢哋成班演員就喺社交網洗晒版甫相，大晒佢哋嘅情人節扮相，當中就有「送水輝」許家傑口中嘅唏噓小王子、咬唇小公主、修女蓮、西人輝等，加埋扮海盜王嘅單立文、吸血鬼張景淳等，真係花多眼亂！當中就要數扮Elsa造型撞到啪啪聲嘅KC，佢戴上金色假髮、性感低胸（仲要有事業線喎），微微咬唇Chok純純怕醜樣，真係齋睇相都令人硬起上嚟……個拳頭，大家少啲意志力都會嘔，切記慎入、慎入！（雖然文尾先講冇乜作用…）