【繼蓋世寶之後】認字特警李天翔宣布離巢

最近藝人蓋世寶宣布離開無綫，同蓋世寶一樣都係兒童節目出身嘅李天翔，今日情人節都喺社交網宣布即將離巢，佢上載一張黑白背影相，留言話：「今天作出了決定，離開並不代表放棄、灰心，只希望往後的路可以走得更遠，感激一直陪伴着我的粉絲們，謝謝您們的愛和支持。」據知佢5月約滿之後就唔再續約，決定向外闖。

李天翔入行超過二十年，憑扮演「認字特警」而廣受小朋友歡迎，之後轉到戲劇組，經常扮演壞人角色，但都算入屋，如今佢宣布離開，一班網民都話好可惜。