朱晨麗發燒38度　工作要改期！

藝人朱晨麗（朱朱）近日忙於拍攝新劇《法證先鋒IV》，忙到休息時間都唔夠，搞到不幸病咗，真係陰公豬喇！朱朱上載咗張戴住口罩自拍照，透露自己發燒38度兼嘔得好勁：「行路都需要人攙扶，多謝醫生對我細心治療，亦要多謝工作人員對我嘅體諒！真係辛苦晒了，要照顧我整晚，感恩！後記：叫你飲多啲水係愛，斟杯水俾（畀）你嘅係真愛！」網友仲話朱朱所講斟杯水畀佢嘅嗰位，唔知係咪緋聞男友何廣沛呢？

而朱朱事後接受東網訪問表示日前拍海邊戲時冷親，拍完嗰日都唔係好舒服，冇咩胃口：「之後開始唔妥同埋嘔，嗰時仲未發覺自己發燒，只覺得有啲發冷，去睇醫生量體溫就燒成38度幾，依家食咗藥都好番啲。本身公司約咗今晚都有嘢做，但都同咗導演溝通可以改期。（係咪冧廠？）唔係，只係返去練嘢，好多謝醫生漏夜幫我睇病！」又指今晚原本約咗《多功能老婆》嘅演員食飯，但依家自己病咗去唔到，感到好可惜。