陳瀅開心上車買加拿大樓：幾十萬加幣

藝人陳瀅（Jeannie）、胡楓、羅蘭、張子丰到銅鑼灣出席活動，身穿婚紗的Jeannie透露目標35歲前結婚，現時29歲尚有幾年可努力，她透露早前放假兩星期返加拿大拜年，再次被92歲婆婆催婚：「佢嘅夢想係見到我開枝散葉，我覺得呢啲嘢唔急得。（咁你會揀緋聞男友羅天宇定陳家樂？）兩個都唔係，依家我仲係單身，呢一刻冇人追！我有另一個好消息要宣布，我完成咗婆婆另一個心願，就係置業，睇中咗一間屋，只爭啲文件未處理好。（使咗幾錢？）幾十萬加幣（約幾百萬港幣），嗰邊買平過香港好多！第一次置業係值得慶祝，但開心咗一陣就覺得好大壓力，因為之後要供，好大負擔，又要供到樓，又要搞得掂香港嘅生活！（之後結婚對象都要揀有樓？）我依家都有啦！我覺得愛情唔好咁物質，最緊要溝通到，啱嘅時候遇到啱嘅人，結婚同拍拖唔同，而家想搵結婚對象。」