《黑幕》最快年底開拍　張家輝有冇得復活？

導演麥兆輝執導英皇電影《廉政風雲 煙幕》票房大收，台前幕後振奮不已，他感激老闆楊受成無論於創作及拍攝上給與很大的自由度及支持：「唯一係當初開拍呢套戲時，楊生好鍾意《廉政風雲》呢個名，但我就好喜歡《煙幕》兩個字，因為呢套戲講私煙、人心難測好似滿布迷陣咁，好彩我喺廉署做資料搜集時，發現有幾個故事都好吸引。我就同楊生講，不過開夠《廉政風雲》上、中、下集啦，所以同《無間道》及《竊聽風雲》嘅情形唔同，呢次係首次（電影）未開鏡，我已決定拍足3集。」

《煙幕》後，英皇將繼續投資《黑幕》及《內幕》兩集，而以本港違標問題做故事骨幹的《黑幕》，最快將於年底投入拍攝：「題材可能會同《竊聽風雲3》有啲類似。我覺得違標犯案好難查，記得1、2年前香港沙田某屋苑，業主立案法團主席同其他人夾埋違標，結果搞到好大件事，呢單案我印象好深，亦明白咁對民生影響好大，所以先有咁嘅構思，今次全片應該只喺香港取景，製作費同《煙幕》差唔多，預算1億左右。（原班陣容演出？）盡量啦，都諗緊角色擺位，好似張家輝已經死咗，我又接受唔到續集佢行出嚟就話係孖生兄弟，或者有血緣關係但長得一模一樣嘅人！」

麥導坦言可以有兩個方案，首先是原班演出一個嶄新的故事，又或者延續《煙幕》的故事骨幹再作處理，因有感「個故仔仲未講完」﹕「我想講落去嘅，係劉青雲及林嘉欣嘅夫妻關係，《煙幕》結尾時佢兩個好似和好如初，但又未必風平浪靜，加上青雲被廉署炒咗，係咪真係咁簡單呢？」談到一眾演員早前天馬行空，自行創作續集內的角色，麥導聞言即笑謂：「咁都得？講吓咋？真係想演乜就乜咩，邊有咁易估到我想點吖？」