又肥又腫！鍾舒漫用極端方法紓壓

歌手鍾舒漫（Sherman）擔任ViuTV節目《Good Night Show發洩擂台》的嘉賓，她謂聽到節目名就覺得興奮，香港人壓力大，做娛樂圈壓力亦不少，雖然她自己有發洩方法，但這類節目可讓她有個大平台盡情發洩，問到壓力來源？她說：「離唔開工作，另一個壓力係覺得自己好肥好腫，好多人都唔信，啲人話你咁瘦，其實係我遮住啫！不過我覺得如果太在意，不斷跑步又節食，成效唔大，有時反而唔太在意，就會自然瘦，係佛係減肥。」

至於發洩方法，她稱有兩個極端方法，一是不斷食，另一個是消耗體力：「我多數會選擇後者，因為前者嘅話肥咗好難返轉頭。或者想發洩時打畀我個妹鍾舒祺廢噏，因為佢仲廢噏過我，可以將我冷靜落嚟，係我嘅良方妙藥。」