拍完劇玩完！陳瀅降呢陳家樂做普通朋友

藝人陳瀅出席活動，佢以低胸上陣，但中間就有一層薄紗遮住，若隱若現。屬蛇嘅佢今年犯太歲，佢話本身都唔信，但尋日發生咗就信咗啦：「我平時揸車都好小心，好少撞車，但係尋日竟然同一日，刮花咗架車兩次。（唔係人哋撞？）唔係，我自己唔小心，我估應該係入停車場嘅時候唔小心，因為尋日套劇《福爾摩師奶》首播，我哋成班演員約埋一齊食飯。但我今晚就要飛去巴黎，所以即刻打畀媽咪叫佢幫我攝太歲。」

同陳家樂係普通朋友

佢透露將會飛去巴黎出席時裝周一個星期，終於都實現到自己一個小小嘅夢想，問到屆時會唔會遇到桃花？她說：「我日日都要做嘢，不過我識少少法文，都識同人溝通。（覺唔覺得法國男仔特別浪漫？）成個城市都有浪漫嘅感覺，特別係愛情嘅感覺。（帶埋緋聞男友去？）我同工作人員一齊去。（香港男仔唔浪漫咩？）好睇性格，有啲女仔sweet啲，有啲strong啲。（咁你識嗰啲男仔浪唔浪漫？）一啲啲。（陳家樂呢？）唔清楚，呢排冇乜聯絡，拍完劇就冇乜聯絡。（拍完就無啦？）咁都好正常，拍戲嘅時候會有交流，通常女仔容易keep到聯絡，但係我同佢係普通朋友，一直都係。（冇人追？）係呀。（主動出擊？）一時時會，但我哋經常畀人拒絕。」