飛的太貴！Aka＠SG為慳錢改搭公共交通

組合Super Girls隊長Aka（趙慧珊）及C AllStar成員陳健安（On仔）出席理財活動，兩人已有一段時間冇見，一碰頭即傾到雞啄唔斷，Aka表示：「我哋好似，因為都係組合出身，但最近都係自己推出新歌，仲要都係一月出歌，所以可以一齊平步青雲。」另外，講到理財心得，On仔笑言：「賺多啲錢，但我冇乜儲錢方法，唔識儲錢。（你好大使？）唔係，反而呢排學緊『斷捨離』，一啲唔用嘅嘢就會扔，先會更加知咩係重要，同埋買嘢先至會知咩係需要，而唔係衝動，啲錢應使則使。」

Aka就謂自己好懶：「所以我成日留喺屋企，覺得留喺屋企先至係最慳錢，因為唔使出去搭車、食飯，每個月會留幾千蚊畀自己，然後淨低就畀媽咪儲，可能過咗唔知幾多年之後可以買到樓。」問到可會投資？On仔則表示：「依家會先投資喺自己嘅身體同知識上。」而Aka亦謂：「我都係投資喺唱歌先，千幾蚊一堂，真係好貴！好彩做gym有sponsor。（咁你一個月幾千蚊夠使？）最緊要係學唱歌，同埋我發覺使得最多錢係搭的士，為咗慳時間或想瞓晏啲，但搭的士好貴，所以遲啲想搭多啲公共交通工具。（唔驚粉絲認得你？）有人認得我好開心呀！（歡迎佢哋同你影相？）歡迎。」