林作寸劉思希非高學歷　麥明詩：佢鍾意諷刺

藝人麥明詩（Louisa）出席翡翠活動，談及舊愛林作在社交網站上載劉思希在科大讀EMBA課程的報道，並指對方稱不上高學歷，對此Louisa避重就輕地說：「我覺得亞洲人太着重學歷、排名同張沙紙，我好慶幸有張沙紙，但喺娛樂圈做咗幾年都知，學歷係自己對自己嘅追求，唔應該用學歷去衡量一個人嘅價值。讀大學係為知識追求，我係讀法律，其實都唔夠純學術性，如果可以揀，我會揀純學術性嘅科目，訓練獨特嘅思維能力。（你認同林作所講？）係你講啫！我其實冇follow佢個社交帳號，我覺得佢有時鍾意用諷刺自嘲手法去表達。」

Louisa自言向來比較樸素，但隨年紀增長也要開始打扮，不可以再賣青春，她稱媽咪有幾件由外婆留下來的翡翠首飾：「以前覺得自己carry唔到，但依家覺得可以。我公公以前做珠寶生意，所以佢買咗好多首飾畀婆婆，但後來經濟不景，剩低嘅唔多。」她笑言媽咪經常說婆婆愛扮靚，可能自己貪靚是來自婆婆的隔代遺傳，開玩笑指希望婆婆的首飾也能隔代傳給她：「我媽咪唔係好貪靚嘅人，佢好大方成日都叫我戴佢嘅首飾，我可能會攬住啲首飾唔畀小朋友，不過有小朋友之後個心態又可能唔同。」

問到有否想過繼承公公的事業做珠寶生意？Louisa坦言沒想過，因為小時候沒有跟對方學習有關知識，而且母親亦沒有就這方面向她作出薰陶：「不過大個之後諗番起呢個根，又係靠呢樣嘢去養活一家人，所以都想學吓珠寶知識，我哋做藝人經常話戴幾百萬、幾多卡首飾，其實好單面，我想自己特別啲，如果可以分辨到啲珠寶就顯得更有氣質，我又唔夠人幾百萬珠寶咁多，身材又唔夠人好，惟有喺第二樣嘢突圍。」