10年前贏華姐冠軍　苟芸慧：有少少感觸！

藝人苟芸慧（苟姑娘）穿黑色tube dress現身《2019國際中華小姐競選》晒出4吋事業線！苟姑娘透露老公陸漢洋亦有同行，她謂：「靚女梗係多人鍾意睇。（老公其實係睇實你？）唔係，欣賞唔同國家佳麗嘛！（打扮性感要老公過目？）通常佢幫我揀衫，到佳麗轉泳裝就會專心睇。」曾是華姐冠軍的她，獲在場傳媒指她再參選也能揮低一眾佳麗奪冠，苟姑娘聞言即笑咪咪謂：「多謝，當年參選至今都10年，人生有幾多個10年，所以都有少少感觸，依家位置唔同咗，有啲嘢過咗去就冇得番轉頭，所以要珍惜。」

問到擔任「鑽石評審團」的她可有評審準則？苟姑娘謂：「自信心好緊要，要淡定，我會睇談吐，反應都會計分。」對於與舊愛羅天宇同場，苟姑娘起初也叉開話題避談，及後記者再追問才謂：「點解你哋咁掛住佢，佢個女朋友....」記者即指二人經已分手，她才謂：「我唔知亦冇留意，不過見到會打招呼，大家有各自生活好開心，有啲嘢都係stay in past啦！」