鍾舒漫唔學妹妹瞞婚：本來想叫佢等埋我

歌手鍾舒漫（Sherman）現身電台活動，提起妹妹鍾舒祺（Sukie）被爆於情人節低調升級做人妻，與樂隊Ever結他手李恒韜拉埋天窗，Sherman表示妹妹本身的確想超級低調，一年前更已經有結婚打算：「以為佢講吓㗎咋，想叫佢等埋我，點知今年頭就同我講話2月14要結，都嚇親我，搶先我一步！但都好戥佢開心，佢哋都一齊咗10年經歷好多，係妹妹接受唔到做人妻嘅感覺，驚變師奶，因為佢仲想接少女Job，不過我都同佢講唔緊要，話有好多Artist結完婚事業更好。」

提到Sukie註冊當日只有Sherman及牧師、師母做見證人，雙方父母均缺席，Sherman表示因為Sukie之後會於年底補擺酒，又爆妹妹原本冇諗過要公開宣布婚訊，問到Sukie瞞婚是否想欺騙大家？Sherman護妹說：「唔係呃大家，係佢接受唔到自己做人妻啫。」

問到Sherman如果結婚會學妹妹一樣瞞婚？她即笑謂：「要睇雙方，但唔公開唔等於瞞大家，如果到時公開，就係結婚嘅時候。」追問現時可以公開？她抵死笑話：「未，今日未！（想拍拖？）單身都想有個伴陪嘅。（有對象？）咁耐點都有，我又唔係收埋自己。」續自爆現時有位特別心儀的圈外男性朋友，問到會否乘勢追擊？她怕醜話：「冇諗呢啲，有想拍拖嘅意思、有想發展嘅對象都好正常。」