中環出巡　張智霖冷落靚靚拉仔密密斟

圈中恩愛夫妻張智霖（Chilam）與袁詠儀（靚靚）早前度過結婚18周年，兩公婆於農曆新年時帶同囝囝張慕童（魔童）外遊慶祝，現年12歲的魔童遺傳了父母優良基因，長得高過爸爸膊頭，外表又俊俏。

日前晚上7時許，一家三口出巡中環享受家庭樂，期間更於商場內「搵食」，魔童選擇食漢堡包、薯條等，兩公婆見餐廳內多人，於是極速去買外賣，未幾靚靚與魔童各拿着一袋外賣離開。沿途見魔童只顧黐住Chilam，兩父子邊行邊傾，未有理會身旁的靚靚，觸角敏銳的魔童其後發現有記者在場，即望向鏡頭表現淡定任影，還發揮其「星二代」風範點一點頭打招呼，然後才繼續與爸爸密密斟。

三人步往取車，被冷落的靚靚原本一直木無表情，但見到代客泊車員上前招呼時，即笑笑口與對方吹水，而Chilam亦豪爽地拿出兩張「紅衫魚」給予兩名泊車員，之後才駕車返歸。