轉做網紅多Job接！陳琪羨慕孫耀威吸金勁

對於藝人孫耀威於內地做「網紅」賺勁多錢，現已轉做KOL的前無綫藝人陳琪亦表羨慕，她稱自己因為網紅工作而多了拍廣告的機會，更有傳她月入10萬，她笑言：「如果係就發達喇！不過以前做電視都唔會有咁多人搵我拍廣告，反而依家多人識，下個月拍護膚品廣告！（多人識咗？）出街有Fans同我打招呼，嗰種滿足感多過賺錢，但如果有更多錢賺當然更好！」

由於內地網紅粉絲人數動輒過百萬，陳琪稱：「之前開過微博戶口，但有黑客入侵就刪咗，換電話後冇再開，但我聽到孫耀威個Case咁勁，我同佢天淵之別啦！大陸市場咁大，閒閒哋都過百萬粉絲，唔知有冇星有一億粉絲呢？但嗰個肯定唔係我囉！」

直播當娛樂

而藝人謝東閔打機打到街知巷聞，更不時在社交平台直播打機，不過他就謙稱算不上網紅：「網紅就唔敢，我會直播打機同其他人分享吓打機心得。本身最鍾意打足球遊戲FIFA，經常都有網友留言話要同我切磋，其實咁都可以識到唔少對手。」問直播收入是否可觀？他坦言只當直播是工作以外的娛樂：「不過我打機都有同遊戲商合作，所以收入都OK，之前又去洛杉磯同日本參加佢哋嘅活動，所以都幾好。」他稱若有機會打入大陸的直播市場就當然最好。