學孫耀威做網紅？田蕊妮搵人壯膽開Live

藝人田蕊妮（阿田）大騷單邊香肩，現身新城電台宣傳最新大碟《Saturnian》，她笑話雖然之前因拍戲而延遲宣傳，不過新碟銷量不錯：「之後會再派新歌《最親》，內容係講媽媽，呢首歌係錄得我最多時間，聽落好輕鬆，但歌詞好感動，知道有好多人最鍾意呢首歌，話聽完會眼濕濕，之後會拍MV。」

講到有意加推「阿田蜜蜜送」名額以及去唱片舖搞簽名會，她表示稍後會於開會期間提出：「成40歲人出實體碟已經好難得，都唔知仲有冇機會再出，自己停工一年做呢隻碟，好有信心介紹畀大家。」續指有自掏腰包入手20隻送朋友，但笑話所有朋友都唔「領情」：「每一個都話要畀番錢我！Ali（李佳芯）話要訂10隻，最初以為佢捧場或者講笑，點知佢不停追我拎碟，就同佢講不如送隻畀佢，又唔知點收錢，點知佢真係要10隻，阿廉（曹永廉）都買咗一隻。」

提起同公司的孫耀威跨界做網紅開Live袋百萬，阿田大反應抵死笑話：「恭喜晒佢！我8號會見到佢，會準備一幢碟收佢錢先！（想仿效對方開Live搵銀？）都好，但要搵人壯膽，或者搵吳業坤，佢彈琴我唱歌。」又透露本應會做坤坤紅館騷嘉賓，但現時決定不做，大笑話：「為咗避開佢要離開香港，其實係要去加拿大做嘢，覺得同佢都冇緣份，兩次開騷都冇機會，唔知係我行運定點，哈哈！」