蕭正楠曹永廉唱爆K房　揚言年尾紅館見

藝人曹永廉與蕭正楠這對好兄弟感情甚佳，就連蕭太黃翠如都愛死佢哋，經常將二人掛在嘴邊。阿蕭與阿廉不但一齊拍劇、做綜藝節目，更頻頻接登台Show拍住上搵真銀，佢兩個又搞笑又抵死，同是唱家班唱歌又好聽，果然係「偶像實力派」藝人，難怪咁受啲客戶歡迎。

尋晚，佢哋齊齊唱卡拉OK，原來是為之後嘅工作練歌，更合唱一曲—《一生中最愛》，阿蕭又於社交網PO片，佢話：「我同阿廉哥好勤力咁練歌，準備四月份美加演唱會！」跟住阿廉話：「係呀！同埋我哋準備定年尾紅館嘅演唱會啦！」搞到阿蕭都接唔到兼忍唔到笑。其實，佢哋美加開演唱會係事實，講到紅館，真係唔知有冇機會。不過，好多粉絲都留言，希望佢哋快啲喺香港開演唱會。

另外，阿廉又於社交網上載阿蕭唱《高山低谷》嘅片，又留言：「有進步空間，好大空間！」不過，此話竟令不少圈中好友寸爆，田蕊妮留言：「你講緊自己嘅攝影技術？」湯寶如又謂：「學吓人啦！唱得幾好聽。」阿廉認真人緣好。

唱完歌，仲有下文，原來佢哋約咗黃智賢、唐文龍等食晚飯，仲齊齊收睇黃智賢擔演嘅《福爾摩師奶》，認真夠老友。