決戰摩星嶺　BINGO畀蚊圍搞到濕晒

女子組合BINGO趁「三八婦女節」推出新歌《後街女孩》，認真應景，對於事隔一年再推廣東跳舞歌，心情既興奮又緊張，新歌概念原於一個日本動漫，是次的舞蹈以「抖音」熱播歌當中的健康舞蹈及「食雞」遊戲中的動作改編而成，動作簡單易記。

成員Carman說：「因為跳舞跳左足足七粒鐘，頭髮同衫褲都濕晒，濕到好似啱啱淋完雨咁！拍攝途中，同事叫我哋扮啲麻甩嘅動作去配合首歌的主題，發現原來做番自己就係最麻甩，同事都話我好適合行麻甩路線。」MV中首次有男主角參與，令拍攝過程更加好玩。

成員Queena說：「今次係我加入BINGO第一個MV，好多人話我『眼大無神』，平時自己就唔太留意，但在鏡頭前就表露無遺，尤其拍大頭同面部表情時，眼要識講說話，我就好似停咗機咁。導演一直在旁邊配音，指導我做表情和動作，最後自己回帶重看都覺得好搞笑。」當日她們到摩星嶺山上取景，Queena出名勁惹蚊，穿短褲關係，即使塗了蚊怕水也無補於事，笑言執相主力是執走蚊瘌。

成員Odilia說：「最難忘係今次有機會拎道具槍拍攝，因為我平日鍾意打槍Game減壓，今次可以扮槍手，一嘗所願，應該型過食雞遊戲入面啲人物，哈哈！同埋怕水腫，拍之前一晚唔敢食太多嘢，搞到瞓唔着。」