同老婆咀足3次！甄澤權婚宴表演魔術

魔術師甄澤權（Louis Yan）與女友李綺嘉（Elffi）在四季酒店舉行婚宴，筵開20席，現場以舞台表演為主題，有一些羽毛、燈牌等裝飾，配合Louis魔術師身份。一對新人與陳庭欣和林盛斌（Bob）等兄弟團會見傳媒，一對新人Sweet爆咀足三次，問到今早接新娘有否感動位？Louis說：「有少少喊，因為懲罰食咗Wasabi，愛的宣言就簡略講咗啲，驚喊，今晚再講長啲，都驚忍唔住喊！頭先好感動係外父同佢出嚟話將個女交畀我，我覺得責任大咗！（有咩愛的承諾？）對佢好啲，令佢幸福。（財政畀佢管？）都管咗好耐。（今朝接新娘順利？） 都有諗過唔開門點算，諗過穿門入去，結果都唔使，入到去要答問題，五條答錯咗三條，要被罰做掌上壓、食Wasabi、幾個兄弟企喺紙上面。」問到開門利是幾多？一對新人表示是開心價，Elffi笑言已叫姊妹錫住老公，因此沒有太刁難他。

會有特別演出

問Louis今晚可有表演？他透露會表演一些魔術，還有一樣特別演出：「太太都未知係咩，幾特別，唱歌跳舞耍功夫都有可能，練咗個幾月，希望大家知道我魔術以外有其他才能。（今晚不醉無歸？搵阿Bob頂酒？）阿Bob中間應該會醉，大家責任仲大咗，都好多賓客會飲，唯唯（梁競徽）都喺度，佢哋係孖寶，但我要準備表演，頭一半時間唔會飲，睇吓最尾會唔會同大家盡興少少。」他們透露婚禮使費近七位數字，至於鑽戒卡數則不願透露。

隨時造人

問到生BB計劃，Louis表示已二人世界一段時間，隨時歡迎小生命降臨，一切順其自然。至於蜜月安排，Louis說：「婚禮之後我哋就要工作，需要延遲，不過之前做嘢關係都去過世界好多地方。」Elffi表示想去英國及德國，因比較浪漫。

另外宣布離婚的呂慧儀本來也在賓客名單之列，但透過公關表示今晚不會出席，Louis表示得知她缺席，但對方未有透露原因。