網民出歌挑機　林作獻聲反擊震耳膜

前大律師林作經常語出驚人，早前藝人劉思希透露正修讀緊科大EMBA課程，因此被外界譽為高材生，而畢業於英國牛津大學嘅林作突然跳掣，出甫指劉思希並非高學歷，更表示：「科大其實國際上有幾多人識？」呢單學歷風波隨即成為網民熱議嘅話題，有網民上載名為「林作之歌 兩老笑膠你朋友+科大EMBA 棟篤笑 最佳損友」嘅片向林作挑機，寸林作自打嘴巴之餘，亦喺片中笑林作經常派膠，更為佢作咗首歌！歌詞內容大意上係諷刺林作靠阿媽，成日將學歷掛喺嘴邊，又經常亂講嘢辣着火頭，唱完之後點名要求林作唱埋下半Part！

作風大膽嘅林作冇有怕，親自接歌兼甫片回應網民，佢表示：「林夕親戚林作2019年作詞人自填自唱作品 《最佳笨友》完整版。頭半段唔關我事。後半段林作真情演繹。」林作把聲一出真係聽到人隻耳仔震一震，佢全情投入、唱得聲嘶力竭，喺歌詞中為自己反擊指「為何舊知識，講到極，你都get不透」，結尾仲不斷強調自己個名，呢個下半Part雖然歌藝未夠，不過誠意搭救啦，唔知各位網民睇完收唔收貨呢？